《cu v3 聲》 【AI 重點】 01｜創辦網店契機（00:00:12–00:00:46） 02｜決定全職創業（00:00:47–00:01:27） 03｜二十七歲確診癌症（00:01:27–00:02:15） 04｜家人陪伴抗癌路（00:02:15–00:03:20） 05｜克服骨枯重拾步履（00:03:20–00:04:30） 06｜重開卷蛋店謝顧客（00:04:30–00:05:25） 07｜招牌麻糬卷蛋特色（00:05:25–00:06:07） 08｜抗病重新出發感悟（00:06:07–00:06:53） ──────────────── 【逐字稿】 【00:00:00】嘉慧 · 商戶 咁零七分嘅時候—— 【00:00:01】可嵐 · 主持 爆滿。 【00:00:01】嘉慧 · 商戶 我就已經滿哂啦，我就覺得，哇，有冇咁誇張啊。 【00:00:04】可嵐 · 主持 七分鐘咋喎。 【00:00:05】嘉慧 · 商戶 嗰陣時我就覺得晴天霹靂喎，我先二十七歲咋喎，我仲有好多嘢未做。 【重點 01｜創辦網店契機】 【00:00:12】可嵐 · 主持 今集呢，我哋好開心呢，可以邀請到 CU Roll Cake 嘅創辦人家蔚—— 【00:00:16】嘉慧 · 商戶 Hello。 【00:00:17】可嵐 · 主持 嚟到我身邊。啲咩緣故令到你真係突然之間，咦，忽發奇想，啊，你又會識做呢個 roll cake 啦，跟住同埋又會想創業嘅呢？ 【00:00:25】嘉慧 · 商戶 就疫情嗰陣時喺香港啦，冇嘢做，因為其實我好鍾意去旅行。 【00:00:29】可嵐 · 主持 嗯。 【00:00:29】嘉慧 · 商戶 咁我困住啦，有一日呢，就喺度睇手機。 【00:00:32】可嵐 · 主持 嗯。 【00:00:33】嘉慧 · 商戶 就碌到一條片，就教人整 roll cake 喎。啲朋友話：」啊，不如你去試下開網店啦。」咁樣。跟住就開咗個 IG shop，跟住點知就真係有人買喎，真係收到錢喎，就開始咗呢條創業之路。 【重點 02｜決定全職創業】 【00:00:47】可嵐 · 主持 係啲咩原因令到你呢，咁有勇氣突然之間直情將 roll cake 呢一樣嘢創業成為自己事業呢？ 【00:00:53】嘉慧 · 商戶 嗰陣時 IG 開團結，兩點一開放，睇住電腦，不停，呃，啲回覆不停加加加加加加加加加加。咁誇張啊。 【00:01:01】可嵐 · 主持 七分鐘咋喎。 【00:01:02】嘉慧 · 商戶 係啊。 【00:01:03】可嵐 · 主持 仲要第一次開團。開始創業嘅時候，咁係咪直情就 quit 咗嗰份穩定的工作？ 【00:01:08】嘉慧 · 商戶 我自己有啲 [咂嘴] 不甘心。 【00:01:11】可嵐 · 主持 嗯。 【00:01:11】嘉慧 · 商戶 即明明，哦，我可以接到咁多單，我可以，呃，再 build up 多啲自己嘅人工喎，咁點解唔試下呢咁樣？ 【00:01:20】可嵐 · 主持 嗯。 【00:01:20】嘉慧 · 商戶 咁就有呢個諗法之後就粗粗地就揾間工場租咗，跟住就 quit 咗份工。 【重點 03｜二十七歲確診癌症】 【00:01:27】可嵐 · 主持 但係我又知道呢，你呢個事業呢，中間呢突然之間停滯咗一段時間喎，咁究竟發生咩事呢？ 【00:01:33】嘉慧 · 商戶 咁有一日喺工場度做嘢，咁我做做下覺得自己好唔舒服，發，好似發燒咁樣。咁去到樓下，我就無啦啦暈咗條街度，咁當時就入咗醫院，咁就做咗個檢查呢，就掃描個腦呢，話生咗一嚿嘢，冇得醫嘅，應該十成都係腦癌嚟嘅。聽完腦癌之後呢，我係畀唔到反應佢。 【00:01:54】可嵐 · 主持 嗯。 【00:01:54】嘉慧 · 商戶 咁啊醫生走咗之後，我就自己喺手機度 Google，就腦癌啦，咁，咁嗰陣時我就覺得晴天霹靂喎，我先二十七歲咋喎，我仲有好多嘢未做，我唔想咁快死呀，因為我仲有屋企人㗎嘛。之後就再做咗好多檢查啦，之後翻勾就係一個淋巴癌，咁就喺醫生—— 【重點 04｜家人陪伴抗癌路】 【00:02:15】可嵐 · 主持 又 Google 啦嘛。 【00:02:16】嘉慧 · 商戶 係啦 [笑]。係嗰陣時醫生同我講嘅。 【00:02:19】可嵐 · 主持 哦。 【00:02:19】嘉慧 · 商戶 咁醫生就話：」啊，呢個係有得醫嘅，只係可能條路會，呃，辛苦啲。」我就帶住樂觀嘅心情去面對化療呢件事。化療咗六個月，一路都冇喊過啦，因為屋企人又有陪住我啊，又有朋友陪住我啊，唔係我自己經歷呢件事都，係有佢哋陪我，我先經歷到呢件事。咁媽咪其實以前係有份全職工作做醫院嘅，咁她就有時，呃，收三點呢，就會衝返屋企附近街市啦，就要買啲新鮮嘅菜，咁就趕起五點嚟探病嗰陣時就過嚟整畀我食。就每日，不停日復日都係咁樣做。咁啊探病時間五至八呢，她都會坐到八點鐘，我同她講：」媽咪你走啦。」她，她先肯走囉。即係，即看似好簡單嘅事，其實你要一個人日日都喺度咁樣做，其實係，係唔容易囉。我住院嗰段時間，阿爸阿媽應該係冇坐喺度好安安穩穩咁樣食飯啊，諗起我就覺得 [吸氣] 即係好唔—— 【重點 05｜克服骨枯重拾步履】 【00:03:20】可嵐 · 主持 擔心。 【00:03:20】嘉慧 · 商戶 開心啊。化療完六個月啦，某有一日，個左邊大髀好痛喎，就算唔行路，喐，唔喐啊、喐啊都好痛，就去照一照檢查，話發現我骨枯。嗰陣時乜都做唔到，一喐就痛啊，就每日喺，喺屋企好似覺得自己好，好廢啊，廢人咁樣。就嗰陣時會有啲情緒啊，不停喺度喊啊咁樣囉。因為我嗰陣時坐輪椅，咁啊爸爸會推住個輪椅上斜路啊，呃，他推住我嗰陣時，我就個心會個頭up啊，即係我明明係三十歲，我係應該照顧返你哋嘅，但係就反而，即你要個六十歲，佢係 [嘆氣] 咁樣推上去，我就覺得，即係好心up，但係我就嗰陣時係我做唔到啲乜嘢囉。即係只可以，即感恩我有父母去陪伴我呢段時間。最屘真係做到手術啦，做完手術就，即個人開心哂啊，終於可以正常行路啊，就雖然都係唔可以跑。 【00:04:23】可嵐 · 主持 嗯。 【00:04:23】嘉慧 · 商戶 但係我覺得，即係可以再用自己個雙腳去感受呢個世界，其實真係一件 [咂嘴] 真係要感恩嘅事囉。 【重點 06｜重開卷蛋店謝顧客】 【00:04:30】可嵐 · 主持 今次 CU Roll Cake 再重新開始、再出發嘅時候，自己有啲咩感受呢？ 【00:04:38】嘉慧 · 商戶 真係好大感受嘅。即可能以前係啊，賣到好多卷，但係我嗰陣時目的係想為錢。而家再整呢啲卷蛋啦，我就覺得我多咗一份感恩嘅心，多謝佢哋嚟買我嘅嘢。起開工場嗰陣時，有個客支持到我而家嘅。嗰陣時我喺 IG 宣佈要停業啦，因為我有病，咁佢哋就話：」你身得健朗啦，我會等你返嚟嘅。」但係到我而家真係開返出嚟啦，嗰啲客係真係：」我終於等到你返嚟啦。」咁啱有個客原來係我個朋友嘅同事嚟嘅。 【00:05:13】可嵐 · 主持 嗯。 【00:05:13】嘉慧 · 商戶 佢就話：」我上次見到佢食你啲卷蛋呢，佢開心到喊啊。」 【00:05:18】可嵐 · 主持 嗯。 【00:05:18】嘉慧 · 商戶 即係我覺得成件事好，好感動啊，有人等我返嚟去整返呢啲卷蛋畀佢哋食。 【重點 07｜招牌麻糬卷蛋特色】 【00:05:25】可嵐 · 主持 直情名副其實嘅 CU Roll Cake 啦。最緊要就係話畀大家聽，同其他嘅卷蛋有啲咩分別先。 【00:05:33】嘉慧 · 商戶 嗯，你要試下啦咁 [笑]。 【00:05:37】可嵐 · 主持 係嗎？嗯。真係好軟熟嘅呢個蛋糕啦。裡面嗰個 mousse 呢，都係做得好，好軟熟㗎。個甜度唔會好甜啦，所以入口嘅時候係都好，好似真係有少少入口溶化。中間加咗啲好似麻糬咁。 【00:06:03】嘉慧 · 商戶 麻糬，係啊，係啊。 【00:06:05】可嵐 · 主持 嗯。 【00:06:05】嘉慧 · 商戶 招牌麻糬。 【00:06:06】可嵐 · 主持 嗯。 【00:06:07】嘉慧 · 商戶 嗯。 【重點 08｜抗病重新出發感悟】 【00:06:07】可嵐 · 主持 上一次嘅停業呢，就唔係因為你失敗啦，而係真係自己身體患病啦。咁但係呢，要再一次開呢，其實都需要好大勇氣，因為我知道你而家都仲繼續係接受緊治療啊，你有啲咩感受呢？ 【00:06:20】嘉慧 · 商戶 嗯，我最大感受係，即係雖然上天上次閂咗我一對門，但係我覺得而家係再有新一對門去畀我再重新嚟過啦。 【00:06:31】可嵐 · 主持 嗯，我都相信呢，你嚟緊嘅客人呢，可以更加感受到你呢一個 roll cake 裡面呢，嘅用心同埋裡面嘅美味。今日呢，非常之多謝你呢，可以做我嘅嘉賓啦，咁呢亦都可以畀更加多人呢認識到呢個 CU Roll Cake 嘅。我好 enjoy 佢呢一個 roll cake，我諗大家試完之後都會覺得越食越滋味啊。